СЛОВО НОВОПОСТАВЛЕННОГО ПАТРИАРХА ПИТИРИМА К ЦАРЮ АЛЕКСЕЮ МИХАЙЛОВИЧУ 


     Благочестивейший великий государь наш, царю и великий княже Алексие Михайлович, самодержец и наследниче всея Великия и Малыя и Белыя России и иных многих государств владетелю и повелителю!

     Сердце царя в руце предвечнаго триипостаснаго единосущнаго Бога Отца, Сына и Святаго Духа, по некоему мудру, иже вся неизглаголанною своею мудростию содержит и коло мира сего по воли своей к пользе нашей вращает. Иже древле посылаше Моисея, угодника своего, извести люди из Египта, той же отрицашеся, глаголя: «Кто есмь аз?!» — и моляше избрати могущаго и послати во извождение исраиля, вину предлагая своего неможения. Иеремия же, освященный во чреве, посылаем пророчествовати, нарицаше неведуща себе глаголати и юнша себе зовяше.

     Аз же убо, не равняя себе оным великим, но ведый превелию тяжесть, врученную старости моей, попечения же, и труды, и печалование о пастве, паче же немощь мою, и яко о превеликом предстательстве сем долженствую в день страшнаго втора-го пришествия неумытнаго Судии, Господа Бога нашего Иисуса Христа, слово воздати; издревле же любя безмолвие, его же ради и присутствовах в царствующий град сей, хотех удалитися излишних попечений, якоже сотвори и великий во иерарсех Богослов Григорий, бояся тяжести архиерейства, бегаше в Понт. Аз же за немощь плоти, старостию удрученныя, не могох ятися сего, ведый Великаго Григория сему великому делу и уступивша, но и паки звавшему его покорившася, и от бегства возвратившася, и пастве вручившася. Аарон же, повелеваем от Господа ити во сретение Моисея, ничтоже рассудив, шествова во Египет. Исайя же, повелеваем ити к людем, ничтоже замедлив, отвеща ко глаголющему ему: «Се аз, поели мя», — мнев, яко да оставятся людем греси.

     Аз же смиренный, по вложенному вам от Бога, всестроящаго сия к полезному, зовом вашим пресветлым царским величеством, понуждаем же и молим от всего архиерейскаго священнаго собора и сингклитом всея вашея царския державы на превысочайший царствующего богохранимаго града Москвы и всея России патриаршеский престол, аще и много отрицахся и отметахся за немощь и старость мою и боряхся в мысли удалитися по Богу-Отцу, Давиду: «Се удалихся, бегая, и водворихся во пустыни, чая Бога, спасающаго мя», — но паки возвергох печаль мою на глаголющаго: «Иди и рцы людем сим, Аз отверзну уста твоя и устрою та, аже возглаголеши», — и паки навык из млада непрекословно покорятися божественных отец велению, по реченному: «Послушание есть отложение разсуждения в богатстве разсуждения», — повинухся воли Божией, и вашего пресветлаго царскаго величества велению, и всего архиерейскаго священнаго собора согласию, и всего вашего царскаго сингклита примолению, за силу зовущаго — зане вся мощна Богу повелевающему — подклоних старостию сляченную мою выю в тяжкий и превеликий сей ярем, да не явлюся непокорен.

     Убо смирение наше молит вас, пресветлаго благочестивейшаго великаго государя нашего царя и великаго князя Алексия Михайловича всея Великия и Малыя и Белыя России самодержца, еже не оставити нас, смиренных, во окормлении превеликаго корабля сего, плавающаго в пучине жития сего многоволненнаго, во еже пасти нам, смиренным, безбедно врученный смирению нашему христиано-российский народ сей, простирати вашу пресветлаго царскаго величества руку помощи, якоже и прежде творяху христианстии благочестивии царие, Константин Великий и проч. Понеже ничтоже царству пределательнейше и притщательнейше, разве еже церквам, в нем сущим, соблюдатися всякия напасти и озлобления, и никоему вреду, или нищете, подстояти.

     Прочее мы, смиреннии, аще и нехотяще, обаче же восприимше превеликое достоинство сие, кое воздаяние воздадим пресветлому вашему царскому величеству за ваше к нам, смиренным, превеликое благодеяние? Точию, по божественному апостолу, долженствуем прежде всех творити молитвы, моления, благодарения за вас, пресветлаго православнаго великаго государя нашего царя и великаго князя Алексия Михайловича всея Великия и Малыя и Белыя России самодержца, да призвавый нас Господь Бог в дело сие превеликаго служения вас, великаго государя нашего царя и великаго князя Алексия Михаиловича всея Великия и Малыя и Белью России самодержца, и твою великаго государя супругу, христолюбивейшую государыню нашу царицу и великую княгиню Наталию Кирилловну, и твоя великаго государя благороднейшая чада, а наши великие государи, благороднейшаго царевича и великаго князя Феодора Алексеевича, благороднейшую государыню нашу царевну и великую княжну Татиану Михайловну, благословит.

     И да сотворит вы многолюдны, здравы, благоденственны, и да приложит вам вся благая тысящами сугубо, и да узрите сыны сынов ваших, и да приложит Господь Бог лета жития вашего же и чад ваших в роды родов непреятно в неищетная лета. И да подаст Вам, великому государю нашему царю и великому князю Алексию Михайловичу всея Великия и Малыя и Белыя России самодержцу, победу на вся видимые и невидимые враги, и да сокрушит выю их под нозе благочестивыя державы царствия вашего, вашу же благочестивую десницу да возвысит еще и еще над вся царства и государства!

     По многолетном же, обаче привременном сем царствии, да подаст Господь Бог вам безконечное и вечное царство в части с благоугодившими православными цари: Константином Великим и равноапостольным и со сродником вашего благочестиваго царскаго корене со скиптродержавным великим князем российским Владимиром.

     Нас же, смиренных, да сподобит той же Господь Бог паству врученную нам добре упаствити и на путь правый наставити, идеже веселие блаженное есть безконечно веселящихся. Вся же православные христианы, малые же и великие, всякаго чина же и возраста, сущия под державою вашего благочестиваго царствия, утвердит быти благопокорны и удобопослушны, яко словесныя овцы, своему пастырю, водящему на пажити злачныя, на место прохлаждения. И да устроит житие их в мире, и благоденствии, и во изобилии плодов земных. Да зде, вашею царскою десницею защищаеми, поживше тихое и безмятежное житие во всяком благочестии и чистоте, с паствою, врученною нам, сущею под державою православныя вашея царския десницы, вселимся в кровы небесные, идеже глас празднующих и радость непрестанная: юже радость, при светлом вашея благочестивыя державы царствии, с пастырем же и пасомым, всем христоименитым православно-христиано-российским людем, получити желаю!»

 

7 июля 1672 г.

 

    

 


    Автор проекта и составитель - Александр Петров (Россия)

 Студия "Мастерская маршала Линь Бяо"

 Copyright (С) 2000-2004 by Alexander Petrov (Russia). All right reserved.       Webmaster: petrov-gallery@yandex.ru