ДУХОВНАЯ ГРАМОТА ПАТРИАРХА ИОВА  

 



     Во имя пресвятыя и пребезначальныя животворящие единосущныя неразделимыя Троица, Отца, и Сына, и Святого Духа!

     Аз, раб божий смиренный грешный Иов патриарх царствующего града Москвы и веса Русии, неизреченными его судьбами превысокия и неведомый Премудрости Божия человеколюбия, ими ж той сам един весть, повелением блаженныя памяти великого государя царя и великого князя Ивана Васильевича всеа Русии самодержца избран и поставлен бых, рукоположением преосвящ(енн)аго Дионисия митрополита всеа Русии и прочими архиепископы, и епископы, и освященным собором возведен на престол на Коломенскую епископию к пречистой Богородице честнаго и славнаго ея Успения в лето 7089 (1581) апреля в 16 день. И тамо бывшу ми на престоле четыре лета, и осмь месяц, и двадесять пять дней.

     И Божиим изволением, и повелением блаженныя памяти царя и государя великого князя Феодора Ивановича всеа Русии самодержца, и рукоположением того же преосвященнаго Дионисия митрополита всеа Русии и с прочими архиепископы, и епископы, и со освященным собором поставлен и возведен на Ростовскую архиепископию к пречистой Богородице честнаго и славнаго ея Успения и великих чюдотворцов ростовских епископов Леонтия, Исайя, Игнатия и Иякова в лето 7094 (1586) генваря в 9 день. И бывшу ми на престоле Ростовские архиепископия год без единого месяца.

     И потом неизреченным промыслом превысокого Божия человеколюбия и повелением блаженныя памяти великого государя царя и великого князя Феодора Ивановича всеа Русии самодержца избран и понужден бых от него, государя, аз, смиренный, на великую митрополию царствующего града Москвы и всеа Русии. И рукоположением от бывших ту архиепископов, и епископов, и всего освященнаго собора Руския митрополия возведен и поставлен в митрополиты на превеликий престол, в великую соборную апостольскую церковь пречистыя Богородица честнаго и славнаго ея Успения и великих чюдотворцов московских и всеа Русии Петра, и Алексея, и Ионы, в царствующий град Москву Руския митрополия в лето 7095 (1586) декабря в 11 день на память преподобнаго отца нашего Даниила Столпника.

     И правящу ми престол Руского митрополия два лета, и месяц един, и четыренадесять дний. И благоволением Бога Отца вседержителя, и споспешением сопрестольнаго и единородного Сына его Бога и Господа Исуса Христа, и содействием Пресвятого и животворящего Духа того единого божества и единого существа неразделимыя Троица неизреченными судьбами и превысоким промыслом, прииде бо в царствующий превысочайший славный и преименитый град Москву пресвятейший Вселенский патриарх Констянтинопольский кир Иеремия к славнейшему и пресветлейшему, благочестивому ж и православному к милостивому государю Богом венчанному царю и великому князю Феодору Ивановичю) всеа Русии самодержцу неких ради потреб — или паче реку неизреченным промыслом Содетеля всех, веры ради благочестиваго царя.

     Истинного же благочестия ревнитель, христолюбивый царь и великий князь Феодор Иванович всеа Русии, осияваем благодатию Пресвятого Духа, желанием и любовию побеждаем, о еже снискати премирное и достохвальное богатьство, како бы украсити превысочайший престол великия Росийския церкви патриаршеским достоинством, полагает совет с супругою своею благочестивою и христолюбивою царицею великою княгинею Ириною и возвещает царскую свою мысль ближнему своему приятелю и истинному доброхоту и правителю Руския земля Борису Феодоровичю.

     Он же, слышав совет благ от уст самодержавных, вельми возрадовася душею, ведый, яко Божиим хотением сицево тщание бысть и вера благочестиваго царя. Вкупе ж и сам Богом подвизаем трудолюбным подвигом и великим радением, возвещает благое хотение и веру христолюбиваго царя святейшему Вселенскому патриарху Констянтинопольскому кир Иеремию. И совета блага просит от него, понеже и сам от многаго благоговения имый желание в мысли своей, еже возвеличити превысочайший престол великия Росийския церкви патриаршеским благолепием в похвалу ж и честь великия соборныя апостольския церкве.

     Слышав же се святейший Вселенский патриарх Иеремие, вельми возрадовась душею и благодарная воздаде всесильному и премудрому Богу о благости Господня и всемощныя его силы, иже от своего исполнения преподаде толико благосердие и веру о Святем Дусе сыну своему, Богом венчанному царю и государю великому князю Феодору Ивановичю всеа Русии самодержцу, такоже и тебе, правителю Руския земли и искреннему доброхоту царскому, толико попечение и трудолюбезный подвиг ко исполнению православныя христианския веры и к велелепию и к превысочайшей чести святыя превеликия соборныя апостольския церкви; благодатию же Пресвятого и животворящаго Духа и праведныя ради веры самодержавнаго государя желание сердец ваших исполнит премилосердый Бог, по реченному: "Аще что просите с верою, во имя мое, дасться вам".

     И Божиим превысоким человеколюбием, и изволением о Святем Дусе блаженныя памяти сына моего, Богом венчаннаго царя и государя великого князя Феодора Ивановича всеа Русии самодержца, паче ж попечением и труды истиннаго по благочестии поборника, искренняго доброхота и ближнего приятеля царева, о Святем Дусе присно возлюбленнаго ми сына и государя правителя Руския земли Бориса Феодоровича, ныне же, Божиею милостию, Богом венчаннаго царя и государя и самодержца всея Руския земли, благословением и рукоположением святейшего Вселенского патриарха Констянтинопольского кир Иеремия, по уставу и по правилом божественных апостол и святых отец, и по совету преосвященных митрополитов, и архиепископов, и епископов, и всего освященнаго собора великого Росийского скифетродержания и Греческаго, аз, смиренный Иов, избран и поставлен на патриаршество в преименитом и царствующем граде Москве в соборной апостольской церкви пречистыя Богородица честнаго и славнаго ея Успения на превысочайший престол руских первопрестольников и великих святителей и чюдотворцов Петра, и Алексея, и Ионы в лето 7097 (1589) генваря в 26 день на память преподобнаго отца нашего Ксенефонта и чад его.

     По поставлении же нашего смирения на патриаршество, отец мой и брат о Святем Дусе святейший Вселенский патриарх кир Иеремия на свой престол в Констянтинъград отьиде. И тамо, созвавшу ему собор святейших вселенских патриархов Александрейского, и Антиохейского, и Ерусалимского, такоже и преосвященных митрополитов, и архиепископов, и епископов греческих, иже под их областию сущих, и соборне о поставлении нашего смирения великим утвержением утвердиша и писмены написаша, яко и по нас в род и род Росийской церкве патриаршеским благолепием украшатися и поставлятись патриархом в царствующем граде Москве избранием и повелением благочестивых царей и великих князей всеа Русии от сущих ту митрополитов, и архиепископов, и епископов, иже под нашим патриаршеством во области Росийского скифетродержания. И таковое писание своими руками подписаша и печатьми запечатлеша, яко и во веки быти тому непоколебиму и неподвижиму. И прислаша к самодержавному великому государю царю и великому князю Феодору Ивановичю всеа Русии самодержцу с преосвященным Дионисием митрополитом Терновским на большее утвержение.

     Повнегда же приимшу ми той превеликий престол и правящу, пребых на нем лет...

     Весть же Бог, в колико рыдание и слезы впадох, отнеле ж взыде на мя сан святительства, ово немощи ради своея, понеж не имущу ми довола духовнаго, ино ж о бедах человеческих паствы моея много болезновах и лютыми напастьми погружаем бых. Еще ж к сим в многи скорби и в печали впадох о преставлении о Святем Дусе сына моего, благовернаго и благороднаго христолюбового царя и великого князя Феодора Ивановича, государя и самодержца всеа Русии. И всяко вещем сопротивное нападе на мя: озлобление и клеветы, укоризны, рыдания ж и слезы — сия убо вся мене смиренаго достигоша.

     Паки ж премудраго содетеля, благаго и преблагаго промысленика, человеколюбца Бога Господа нашего Исуса Христа и пречистый Богородицы молением, и великих чюдотворцов Петра, и Алексея, и Ионы, и всех святых молитвами ко всещедрому и всесильному в Троицы славимому Богу, паче же чюдотворных и многочюдесных икон подвигом, повелением и благословением сестры его, благочестивыя великия государыни царицы и великия княгини иноки Александры, избранием же и молением нашего смирения, и всего освященнаго собора, и многочисленнаго православия всенароднаго множества великого Росийского государства, взыде на превысочайший царский престол премудрый храбрый великий государь царь и великий князь Борис Феодорович всеа Русии и венчася царским венцем и святыми бармами от нашего смирения и всего освященнаго собора. Сего ради от печали свободу приях, и порадовахся вельми о нем, государе, и во благоденствии пребывах, понеже бо зело всячески меня преупокои во вся дни живота моего.

     Егда же бех на Коломенской епископьи, и на Ростовской архиепископьи, тако же и в митрополитех, и на патриаршеском степени, яко не могу по достоянию изрещи превеликия его царския милости к себе, смиренному, но за еже ко мне благодеяния и великаго его царскаго милосердия Христос, великий дарователь, воздаст ему праведную свою мзду в нынешний век и в будущий!

     Преходящим же летом и да... лет возраста моего доспевшу, паки постиже мя старость, впадох в частыя различный телесныя болезни, ими же и ныне содержим есть, человеколюбне от Бога наказуем, ничто ж ми ино возвещаще, разве смерть и Страшный суд владыки моего Христа Бога.

     Первое убо сам исповедую Богом преданую апостольскую и отеческую веру православия истинного благочестия, еже во святую Троицу, и елико святая Церковь священная догматы прияла от Бога, и от святых апостол, и от святых божественных отец вселенских седми соборов и поместных святых отец и особ сущих, любезне из глубины сердца многою верою приемлю и почитаю, яко же исповеданием моим написано — то и предах святей божественней Церкви, внегда вначале рукополагахся преосвященным Дионисием митрополитом и всем освященным собором на Коломенскую епископию, також и на Ростовскую архиепископью, потом же и на великий престол Руския митрополия рукоположением от сущих ту архиепископов и епископов, таже и на превысочающую степень патриаршества святейшим Вселенским патриархом Констянтинопольским кир Иеремием и освященным собором Росийского скифетродержания и Греческаго. Такоже и всех молю, наказую, яко присная ми чада, вся священная и апостольская и отеческая предания цела и неподвижима во веки соблюдати.

     Да елицы сих от жития сего отъидоша и елицы еще живи суще, всем подаю о Христе любезное целование и конечное прощение, и сам от них такожде от всех вкупе прощения прошу. И всем святейшим Вселенским патриархом прежде преставльшимся и еще живым сущим даю мир, и любовь, и прощение, и сам от них такожде благословения и прощения желаю получити.

    Господину и о Святем Дусе брату моему святейшему Вселенскому патриарху Константинопольскому преставльшемуся кир Иеремею даю мир, и любовь, и прощение, и сам от него такоже благословения и прощения прошу.

     Православным царем, и царицам, и чадом их преставльшимся и живым сущим даю мир, и благословение, и прошение, и сам от них такоже прощение желаю получити.

     Благоверным великим князем, и великим княгиням, и их благородным чадом всеа Русии преставльшимся подаю мир, и благословение, и прощение, и сам от них такоже прощение желаю получити.

     Благоверному и христолюбивому преставльшемуся царю великому князю Ивану Васильевичю всеа Русии, во иноцех Ионе, даю благословение и прощение, такоже и сам от него прошу прощения.

     Благоверному и христолюбивому о Святем Дусе сыну моему преставльшемуся царю великому князю Феодору Ивановичю всеа Русии даю благословение и прощение, також и сам от него желаю прощение получити.

     Благоверному царевичю князю Ивану Ивановичю преже почившему даю мир, и благословение, и прощение, и сам от него також прощения прошу прияти.

     Благоверной государыне царевне и великой княжне Феодосье преставльшейся подаю мир, и благословение, и прощение, такоже и сам от нея желаю прощения получити.

     Преставльшимся государю Феодору Ивановичю и его благоверной супруге Стефаниде, во иноцех Сундулее, иже израстивши нам прекрасный плод благочестия, Богом венчаннаго царя нашего, подаю мир, и благословения, и прощение, такоже и сам от них прощения желаю получити.

      Благоверной христолюбивой государыне царице и великой княгине иноке Александре Феодоровне всеа Русии мир, и благословение, и конечное прощение, також и сам от нея благословение и прощение прошу.

     Богом избранному, благоверному и христолюбивому и святым елеом помазанному о Святем Дусе, присно возлюбленному ми сыну и государю, Богом венчанному царю и великому князю Борису Феодоровичю всеа Русии самодержцу подаю мир, и благословение, и конечное прощение, и сам от него того же прошу прощения получити.

     Благоверной и христолюбивой государыне царице и великой княгине Марие подаю мир, и благословение, и конечное прощение, и от нея також прощение желаю получити.

     Государю благоверному и христолюбивому царевичю князю Федору Борисовичю всеа Русии даю мир, и благословение, и конечное прощение, и сам от него також желаю прощение получити.

     Христолюбивой государыне царевне и великой княжне Ксение Борисовне подаю мир, и благословение, и конечное прощение, и от нея желаю також прощение получити.

     И кому послит Бог быта по нас брату нашему первопрестольнику на превысочайшем степени Росийского патриаршества, оставляю мир, и благословение, и прощение, також и сам от него прощение прошу прияти.

     Преосвященным митрополитом, и архиепископом, и епископом, под пределом нашего патриаршества прежде почившим, и в наши лета преставльшимся, и ныне еще живым сущим, и елико по нас поставлены будут, подаю о Христе мир, и благословение, и конечное прощение, також и сам от них желаю благословения и прощения получити.

     Також и всем повсюду православным митрополитом, и архиепископом, и епископом, и всему священническому чину и иноческому оставляю мир и благословение и от них такоже прошу прощения прияти.

     Такоже и всем боляром, и вельможам, и дворяном, и всему христолюбивому воинству, и всем православным христианом, и с их женами и з детьми — оставляю мир, и благословение, и прощение, и сам от них також от всех прошу прощение прияти.

     И аще кого будет есмь запретил вниманием или невниманием, а кто будет разрешения от мене не поискал забвением, или простотою, или за оскудение ума — и тех всех о Святем Дусе имею разрешены и прощены во всех летех моих, отнележ поставлен был на степень святительства.

     И аще кто будет на мя в чем позазрел, или пороптал явно, или втайне изрекл — митрополит, или архиепископ, или епископ, и от всякого священническаго и иноческаго чину, и от вельмож, и от всех мирских человек, мужей и жен — елицы исповедаша ми и прощение пояша — да будут прощени и благословени в сий век и в будущий.

     Аще ж кто стыдением, или небрежением, или забвением, за оскудения ума своего ни во что ж вмениша сия, или опасением, бояся мене, не исповедаша ми, или уже умерше, или еще живи суще — тем всем даю благословение и прощение, понеже сие мое есть и моя область, данное ми от Пресвятого и животворящего Духа, еже разрешати их и прощати; и от них такоже прошу прощение получити.

     Тем же убо всех разрешаю, и благословляю, и прощаю.

     А которых есмь священников и дьяконов по правилам святых апостол и святых отец по великим каноном от священства возбранил за их недостоинство — и тех прощаю, а священствовати отнюдь не повелеваю и не благословляю, понеже сие не моея власти есть, еже их разрешати ко священству.

     Елицы ж по Христову евангельскому словеси сотвориша, еже рече Господь: "Слушай вас, мене слушает, и приемлей вас, мене приемлет; приемляй пророка во имя пророче, мзду пророчю приемлет; приемляй праведника во имя праведнича, мзду праведничю приемлет", — и сицево сотвориша, и возлюбиша, и почтиша нас, Господа ради и Евангелия, егда бехом во епископех, и во архиепископех, такоже и в митрополитех и на великом степени патриаршества — буди на тех милость Божия, и пречистыя Богородицы, и великих чюдотворцов Петра, и Алексея, и Ионы, и всех святых, такоже и нашего смирения благословение, да воздаст им Господь Бог праведную свою мзду в сий век и в будущий: се уже предаю многогрешную свою душу в щедроты человеколюбия Божия.

     Тебе же, Богом избранному, благочестивому и христолюбивому, о Святем Дусе сыну святыя Церкве и нашего смирения, Богом венчанному царю государю великому князю Борису Феодоровичю всеа Русии самодержцу, и сыну твоему, благоверному и благородному государю царевичю князю Феодору Борисовичю) всеа Русии, завещаю по данней ми власти от Пресвятого и животворящаго Духа: да соблюдете в веки неподвижиму и непоколебиму православную нашу, чистую, непорочную и пречестнейшую християнскую веру греческаго закона, иже во всей поднебесней яко солнце сияет православие во области скифетродержания великого вашего царского благородия и господства.

     Також и о дому пречистая Богородица и великих чюдотворцов Петра, и Алексея, и Ионы молю вашу царскую державу, о еже попечение велие имейте и сохраните вся живущая в нем под кровом царския своея десницы, яко да збудется на тебе, о Богом возлюбленный сыну, Божие слово, пророком реченное: "А(з) возздвигох тя царя правде, и призвах тя царя правдою, и приях тя за руку десную твою, и укрепих тя, да послушают тебе языцы, и крепость всяку нечестивым царем разрушу, и двери оттворю, и грады сопротивных не затворятся тебе, аз пред тобою пойду, и горы поравнаю, и двери медяные сокрушу, и затворы железныя сломлю!" Се твердое и честное крепкое царство да даст тебе Господь Бог в руце твои, и сынови твоему, и сыновом сынов твоих в род и род и до века.

     Ведомо же буди се державе твоей, о Богом возлюбленный сыну, Богом венчанный царю! Отнеле ж аз смиренный Божиим неизреченным промыслом и повелением самодержца, блаженныя памяти о Святем Дусе сына моего и государя, Богом венчаннаго царя великого князя Феодора Ивановича всеа Русии возведен бых на великий престол Руския митрополия, потом же и на превысочайший степень патриаршества тоя же великия Росийския церкве — и в та лета великия его царские неизреченныя милостыни, и его благоверныя супруги благочестивыя и христо-любивыя государыни царицы велнкия княгини Ирины, ныне же, Божиею милостию, иноки Александры, и их благородныя дщери блаженныя памяти благоверныя царевны великия княжны Феодосьи многая и неизчетныя дачи заздравныя и заупокойныя быша ко мне смиренному.

     Тако же и от тебя, великого государя царя и великого князя Бориса Феодоровича всеа Русии самодержца, и твоея государевы благоверныя и христолюбивыя царицы, государыни нашея великия княгини Марьи, и ваших благородных чад, благовернаго государя царевича князя Феодора Борисовича всеа Русии и благоверныя государыни царевны великия княжны Ксении, многия дачи и неизреченныя милостыни заздравныя и заупокойныя ко мне, богомольцу вашему.

     К тому ж и патрахильные наши всякие доходы и пошлины, что братия наша, прежние митрополиты, имали на себя ж. И тем вашим царским жалованием, заздравными и заупокойными милостынными деньгами, и своими патрахильными и пошлинными доходы владел аз, смиренный Иов патриарх, а ин никто же у мене тем не владел.

     Весть ж Бог, яко в том приобретения и корысти себе не стяжах, а делал аз теми келейными деньгами в дом пречистые Богородица и великих чюдотворцов Петра, и Алексея, и Ионы в ризницу шапки, и саки, и патрахели, стихари, и поручи, и поясы, кадила и лампады сребряные. Тако же и на свой келейной обиход делал панагеи златыя и сребряныя позолочены, с камением и з жемчюги, и посохи сребряныя чеканныя и резныя с финифты позолочены, и манатьи, и шубы, и ряски.

     Еще же давал есмь и в церковное сооружение великих трех святителей чюдотворцов Петра, и Алексея, и Ионы, что на нашем патриаршем дворе на сенех, в каменное церковное, и келейное, и дворовое дело, и в казну казначеем нашим на всякие наши дворовые обиходы.

     Да тою ж своею келейною денежною казною строил домовыя села пречистыя Богородица, которыя запустели преж нас, иные ж, грех ради наших, в наши лета повыгорели. И в тех селех аз смиренный соружал церкви, и ставил наши патриарши дворы для ради наших приказщиков и всяких ради наших оби-ходов, и християн населял, и на подмогу им деньги давал, и всячески нуждным и погорелым Христианом от себя всяко помогал.

     И в том бы вашем царском жалование, в заздравных и заупокойных милостынных денежных дачах, и в наших патрахельных и в пошлинных доходех, что мы имали к себе в келию, никто и никаков человек по нас не пострадал.

     О Богом возлюбленный сыну! Во всех сих написанных молю тя и завещаю соблюдати. Благодать же, милость, мир Господа Бога Спаса нашего Исуса Христа буди на тебе, о Святем Дусе сыну моем, самодержавном великом государе благоверном и христолюбивом Богом венчанном царе и великом князе Борисе Феодоровиче всеа Русии. Тако же и на единородной сестре твоей, благоверной великой государыне царице и великой княгине иноке Александре всеа Русии, и на твоей государеве супруге, благоверной и христолюбивой государыне царице великой княгине Марие, и на ваших благородных чадех, благочестивом и христолюбивом государе царевиче князе Феодоре Борисовиче всеа Русии и на благородной государыне царевне великой княжне Ксение Борисовне.

     Тако же и на преосвященных митрополитех, и на архиепископех, и на епископех, и на всем освященном соборе, и на болярех, и на вельможах, и на христолюбивом воинстве, и на всех православных християнех да будет мир, и милость Божия, и пречистыя Богородица, и великих чюдотворцов Петра, и Алексея, и Ионы, и сех святых молитва, и нашего смирения благословение ныне, и присно, и в непроходимыя веки. Аминь.

     Писана сия прощальная и разрешенная духовная грамота в Богом хранимом преименитом царствующем граде Москве в дому пречистые Богородицы на нашем патриаршам дворе в лето 7113 (1604)».

 

 


    Автор проекта и составитель - Александр Петров (Россия)

 Студия "Мастерская маршала Линь Бяо"

 Copyright (С) 2000-2004 by Alexander Petrov (Russia). All right reserved.       Webmaster: petrov-gallery@yandex.ru